ՏՈՂԱՆՑՔ
ԼԵՌՆԱ ԳԱՐԱԳԻՒԹԻՒՔ
Բազում են կայարաններ
կը սպասեն անցորդներու
մերթ բաժանման
մերթ ողջագուրման
ի վերջոյ երկու գծի վրայ
գնացքը կը սողայ:
Ժամն է ահա ճամբորդութեան
պահ մը սիրելիներ կը հեռանան
պահ մը հարցեր կը բարդանան.
ծանօթ անծանօթ ճամբորդներու կը սպասեն
գծին վրայ գնացքներ.
երկաթը շէկ կը տաքնայ:
Երբ զանգը հնչէ
կեանքը ձեռքերու մէջ
թեւերու փարած
շալակի մը բեռ դարձած
կը հեռանայ:
Մա՞րդը թէ՞ ժամանակը կը սահի
դէպի յառաջ.
մերթ անուրջ մը
մերթ սին պատրանք.
տողանցք մը եռուն երփնաթոյր
որ կը տաղէ միսը
երկաթին ծայրը անվերջ
կ’երկննայ հեռուն
ուղիղ ոչ կոր:
Յաջորդ գծին առանց հասնելու
վախճանը կը հասնի
կայարաններ են անոնք
ուղեւորներու տողանցքին կարօտ
անսպասելի: