Կլենտէյլի մէջ պիտի կառուցուի հայոց պատմութեան ու հայկական մշակոյթին նուիրուած թանգարան

Կլենտէյլի մէջ հայոց պատմութեան ու հայկական մշակոյթի թանգարանի շինարարութիւնը սկիզբ պիտի առնէ 11 Յուլիսին։ «San Fernando Valley Business Journal»-ի հաղորդմամբ՝ աւելի քան եօթ տարի տեւած նախապատրաստական աշխատանքներէն ետք հայ-ամերիկեան թանգարանի երկյարկանի, 50 հազար քառակուսի տարածքով ժամանակակից կառոյցը վեր պիտի խոյանայ Կլենտէյլի Կեդրոնական զբօսայգիէն ներս:

Զբօսայգիի արդիականացման վրայ պիտի ծախսուի 18.5 միլիոն տոլար: Նախագծի հեղինակը Կլենտէյլի «Alajajian Marcoosi Architects» ճարտարապետական ընկերութիւնն է: Կառոյցի՝ ժայռ յիշեցնող ժամանակակից արտաքին տեսքը համահունչ է քարքարոտ Հայաստանին: