Աղօթք Խաչքարեր
Ա՜խ, խաչուած քարեր,
Բիւր դաջուած քարեր,
Անգին խաչքարեր…
Մեր աչքին լոյսը,
Վանքերուն սիւնը,
Սրտի բոբ յոյզը,
Հաւատքի բոյնը՝
Սուրբ Կանթեղ քարեր,
Տանջուա՜ծ քարեր,
Պայծա՛ռ խաչքարեր…
Լռիկ, բայց խօսուն…
Քարէ, բայց փխրուն…
Նրբիկ, բայց տոկո՛ւն,
Կանգնած, բայց ճկուն՝
Փորագիր քարեր,
Հայակերտ քարեր,
Բիւրե՛ղ խաչքարեր…
Անճար ու հնար,
Գերուած ու ազատ,
Գետնին մէջ գամուած,
Երկինք խոյացած՝
Վեհապա՛նծ քարեր,
Տարագիր քարեր,
Լուսե՛ղ խաչքարեր…
Մեր ազգի հնարք,
Մարդակերտ հրաշք,
Աստուծոյ նշխարք,
Ասեղնագործ թագ՝
Խունկ բուրող քարեր,
Սեւցած, թուխ քարեր,
Աղօ՛թք խաչքարեր:
Տիրուկ Կարապետեան Մարգարեան
«Բուրաստան»