ՍԷՐԴ ԱՊՐԻՄ ԱՆԷԱՆԱՄ

Խաչիդ դպչիմ,

Ցաւդ ճանչնամ,

Մեղքիս ցաւը՝ քեզ խաչ հանող,

Անձկութեան քեզ դատապարտող:

Մարմնիդ հպիմ արիւնաքամ, խոշտանգուած,

Առանց Աստուած, ամայացած հոգիդ գտնեմ,

Անձկութեանդ մէջ խորասուզուիմ,

Անձկութեանդ՝ խեղդող, խաւար:

Ամբոխին մէջ ես կորսուած՝

Հասնիմ քեզի,

Քղանցքիդ դպիմ,

Ու հպումէն ահեղ, հզօր,

էութեամբս ես ցնցուիմ,

Մաքրուիմ, բուժուիմ, վերածնիմ:

Շուքիդ հետեւիմ ես անբաժան,

Կրնկակոխ քայլս՝ քայլիդ,

Օրինակովդ առինքնուած,

Ենթարկուիմ, հնազանդիմ,

Դաստիարակուիմ:

Աչքերս հայեացքիդ,

Ամբողջ էութեամբս կեդրոնացած,

Հիացմունքով մագնիսացած՝

Գերիդ դառնամ, ստրկանամ:

Ականջս շշուկիդ,

Ձայնդ ճանչնամ,

Սուրբ խօսքովդ ես հաղորդուիմ,

Իմաստութեամբդ յորդիմ,

Խոստովանիմ, բաշխուիմ, նուիրուիմ:

Ծնկաչոք մտնեմ

Սրբութիւնն Սրբոց,

Վերջին շունչիդ հետ պատռուած,

Ու Աստուծմէ զիս բաժանած

Վարագոյրէն Սուրբ խորանին:

Հոն ճաշակեմ քաղցր մարմինդ պատարագուած,

Ըմպեմ անապակ արիւնդ վասն մեր հեղուած,

«Ի քաւութիւն եւ ի թողութիւն մեղաց»,

Ու փառաբանեմ, օրհներգեմ,

Մեծարեմ քեզ բազկատարած:

Լոյսիդ ձգտիմ,

Ու վեր յառնեմ,

Քեզի հասնիմ ու հաստատուիմ,

Սրբութեանդ մէջ թաթախուիմ,

Սիրտս՝ սրտիդ,

Հոգիս՝ հոգւոյդ,

Սէրդ ապրիմ, անէանամ՝

Գոյութեանդ անհունին մէջ լազուր,

Էութեանդ կապոյտին մէջ անհուն:

Ծովինար Յովակիմեան-Ղազարեան

Փորդլէնտ, Մարտ 18, 2023