ԸՆՏԱՆԵԿԱՆ

 

Դարձեալ մեծ մայրս է​
Որ հնավաճառին օձիքին կառչած​

Իր հին լաթերուն հետ​

Հին ցաւերն ալ ծախել կ’ուզէ

Ներսի սենեակը​

Մայրս խոր շունչ մը կ’առնէ​

Հօրս իրմէ պահած​

Ծխախոտի տուը​
Յայտնաբերելուն առթիւ

Հայրս​

Ճոճուող բազկաթոռին վրայ​

Կը փորձէ ինք զինք գտնել​

Անխաղընկեր աչքխփուկ խաղցող​

Տղեկի մը պէս

Քոյրս​
Եղբօրս հանդերձներուն հետ​
Իր ճմռթկուած երազներն ալ կ’արդուկէ​
Ատենը մէկ ինքնամոռաց​

Ձեռքը այրելով

Եղբայրս​
Ընկերներուն պնդումով​

Անգամ մը եւս կը քանդէ​

Երբէք չլեցուող իր գանձանակը​
Գողի մը զգուշութեամբ

Մինչ ես​
Կարմիր գծիկներով լեցուն
Վիճակացոյցիս մէջ​
Մօրս ստորագրութիւնը կը կեղծեմ

Սարգիս Քէլ Խաչերեան